काठमाडौं, २५ मंसिर / नेपाली कांग्रेसको १४ औं महाधिवेशन अन्तर्गत नयाँ नेतृत्वका लागि उम्मेदवारी मनोनयन दर्ता शनिवार ५ बजे सम्पन्न भएको छ । उम्मेदवारी दर्ता सम्पन्न भएसँगै मनोनयन दर्ता गराएका उम्मेदवारहरु आफ्नो पक्षमा मत माग्न ब्यस्त रहेका छन् ।
नेपाली कांग्रेसको १४ औं महाधिवेशनबाट निर्वाचित हुने केन्द्रीय सभापतिको पदका लागि निवर्तमान सभापति एवं प्रधानमन्त्री शेरवहादुर देउवासहित ६ जना उम्मेदवारहरुबीच कडा प्रतिष्पर्धा हुने भएको छ । उक्त पदमा शेखर कोईराला, विमलेन्द्र निधी, प्रकाशमान सिंह, कल्याण गुरुङ र युवराज न्यौपानेबीच जोडदार प्रतिष्पर्धा हुने भएको छ । नेपाली कांग्रेसका सभापति पदका उम्मेदवारहरु आ–आफ्ना प्यानल बनाएर निर्वाचन प्रचारमा ब्यस्त रहेका छन् ।
नेपाली कांग्रेसको केन्द्रीय सभापति पदका लागि प्रतिष्पर्धी बन्ने सकसमा रहेका डा. सशंक कोईराला, कृष्णप्रसाद सिटौला र रामचन्द्र पौडेल पछिल्लो समयमा उक्त पदको प्रतिष्पर्धाबाट पछाडि हटेका छन् । कृष्णप्रसाद सिटौला र रामचन्द्र पौडेलले बाहिरबाटै उम्मेदवारहरुलाई सघाउने बताएका छन् भने डा. सशंक कोईरालाले सदस्य पदका लागि आफ्नो उम्मेदवारी दर्ता गराएका छन् । रामचन्द्र पौडेल र सशंक कोईरालाले सभापति पदका लागि शेखर कोईरालालाई सहयोग गर्ने चर्चा चल्न थालेको छ ।
त्यस्तै नेपाली कांग्रेसको केन्द्रीय उपसभापति पदका लागि पनि ६ जनाबीच नै प्रतिष्पर्धा हुदैछ । नेपाली कांग्रेसको उपसभापति पदका लागि विजय गच्छदार, पूर्णबहादुर खड्का, धनराज गुरुङ, चन्द्र भण्डारी, सुजाता कोइराला र दिव्यश्वरी शाह प्रतिष्पर्धामा रहेका छन् । त्यसैगरी महामन्त्री पदका लागि डा. मिनेन्द्र रिजाल, डा. प्रकाशसरण महत, गगन थापा, प्रदीप पौडेल, विश्वप्रकाश शर्मा र डा. राजाराम कार्कीबीच प्रतिष्पर्धा हुन गईरहेको छ ।
नेपाली कांग्रेसको आगामी नेतृत्वमा सहमहामन्त्री पदका लागि १९ प्रतिष्पर्धीबीच भिडन्त हुने भएको छ । जसबाट खस आर्य, महिला, दलित, मधेसी, जनजाति, पिछडिएको क्षेत्र, थारु र अल्पसंख्यक क्लस्टरबाट एक एक जना गरी ८ सहमहामन्त्रीमा निर्वाचित हुनेछन् भने खुलातर्फको ३५ जना केन्द्रीय सदस्यका लागि १०९ जनाको उम्मेदवारी परेको छ । कुल १२१ केन्द्रीय सदस्यका लागि ५०९ जनाको उम्मेदवारी परेको निर्वाचन समितिले जनाएको छ ।

Advertisement: