काठमाडौं, १४ असोज / नेपालमा यस वर्ष नौ महिनामा नै ८ लाख पर्यटक भित्रएर पर्यटन उद्योग सुधारोन्मूख रहेको सङ्केत देखा परेको छ । पछिल्लो नौ महिनामा नै नेपालमा भित्रिएको पर्यटकको संख्याले यस्तो सङ्केत देखाएको हो ।
अध्यागन विभागले सार्वजनिक गरेको पछिल्लो विवरणअनुसार अङ्ग्रेजी वर्ष सन २०२३ को नौ महिनामा करिब आठ लाख विदेशी पर्यटक नेपाल भित्रिएको देखाएको छ । अध्यागमन विभागलाई उद्धृत गर्दै नेपाल पर्यटन बोर्डले उपलब्ध गराएको तथ्याङ्कअनुसार यस वर्षको जनवरीदेखि सेप्टेम्बर महिनासम्म हवाई मार्ग भएर सात लाख ८२ हजार तीन सय ७२ पर्यटक नेपाल भित्रिए ।
९१ हजार १२ पर्यटकले पछिल्लो सेप्टेम्बर महिनामा मात्रै नेपाल भ्रमण गरेका र गत वर्ष सन २०२२ को सोही अवधिमा ५८ हजार तीन सय १४ पर्यटक नेपाल भित्रिएका थिए । सन २०१९ मा ९२ हजार छ सय चार पर्यटक नेपाल आएका थिए ।
नेपालमा पर्यटकीय सिजन सुरु भएकाले अबका दिनमा विदेशी पर्यटक आगमन बढ्ने बोर्डको विश्वास छ । बोर्डका निर्देशक मणिराज लामिछानेले पछिल्ला महिनाहरुमा निरन्तर पर्यटक आगमन वृद्धि भइरहेकाले लक्ष्यमा पुग्न सहज हुने बताए । पछिल्लो पर्यटक आँकडा कोभिड–१९ पूर्वको पर्यटक आगमनको ९० दशमलव २८ प्रतिशत हो । सरकारले सन २०२३ मा १० लाख विदेशी पर्यटक भित्र्याउने लक्ष्य लिएको छ ।
प्राप्त तथ्याङ्कअनुसार सेप्टेम्बर महिनामा पनि सबैभन्दा बढी भारतबाट २८ हजार छ सय ४२, चीनबाट आठ हजार एक सय ७४, अमेरिकाबाट सात हजार तीन सय ६४, बङ्गलादेशबाट तीन हजार सात सय १६ पर्यटक नेपाल आएका छन । यस्तै अष्टे«लियाबाट तीन हजार छ सय ८५, संयुक्त अधिराज्यबाट तीन हजार छ सय ४०, श्रीलङ्काबाट तीन हजार ११, जर्मनीबाट दुई हजार आठ सय ५२, दक्षिण कोरियाबाट दुई हजार १८ र इजरायलबाट एक हजार सात सय ३४ पर्यटक नेपाल भित्रिएका छन् ।

Advertisement:

• #अध्यागमन विभाग
• #नेपाल पर्यटन बोर्ड
• #पर्यटन