देशभर जाडो बढेसँगै मौसममा रहने असन्तुलन जारी
![](https://www.tatokhabar.com/wp-content/uploads/2023/11/IMG_20231130_072715.jpg)
काठमाडौं, २१ मंसिर / देशैभरी बढ्दो जाडोसँगै मौसममा समेत असन्तुलन कायम रहने देखिएको छ । जल तथा मौसम विज्ञान, मौसम पूर्वानुमान महाशाखाको दिएको जानकारीअनुसार यो अवस्था देखा परेको हो ।
पश्चिमी वायुको साथै भारतको छत्तिसगढमा अवस्थित निम्न चापीय क्षेत्रको आंशिक प्रभाव रहेकोले नेपालमा यतिबेला मौसममा असन्तुलन देखा परेको जल तथा मौसम विज्ञान विभाग, मौसम पूर्वानुमान महाशाखाको जानकारीमा उल्लेख गरिएको छ । नेपालको कर्णाली र सुदुरपश्चिम प्रदेशबाहेकका प्रदेशहरु आंशिकदेखि सामान्य बदली हुने महाशाखाले जनाएको छ ।
कोशी, मधेस र बागमती प्रदेशमा आज दिउसो आंशिकदेखि सामान्य बदली रहने बताईएको छ । कोशी प्रदेशका एक–दुई स्थानमा हल्का वर्षा र उच्च पहाडी तथा हिमाली भू–भागका एक–दुई स्थानमा हल्का हिमपातको सम्भावना रहेको महाशाखाको नियमित बुलेटिनमा उल्लेख गरिएको छ ।
त्यसैगरी आज राति कोशी, मधेश र बागमती प्रदेशमा आंशिक बदली रही देशका बाँकी भू–भागमा आंशिक बदलीदेखि मौसम सामान्यतया सफा रहने बताइएको छ । कोशी प्रदेशका एक–दुई स्थानमा हल्का वर्षाको सम्भावना रहेको छ । कोशी प्रदेशका उच्च पहाडी तथा हिमाली भू–भागका एक–दुई स्थानमा हल्का हिमपातको सम्भावना रहेको छ ।