धनकुटा, २८ मंसिर / एमाले अध्यक्ष केपी ओलीमाथि धनकुटाको लुगेवामा थप्पड प्रहार भएको छ।

स्वागत गर्नेहरुको लाइनमा फूलमाला लिएर बसेका महेश राईले ओलीमाथि हातपात गरेका हुन् । उनलाई तत्काल प्रहरीले नियन्त्रणमा लिएको हो ।

Advertisement:

पार्टीको मध्यपहाडी लोकमार्गकेन्द्रित ‘समृद्धिका लागि सङ्कल्प यात्रा’ अन्तर्गत ओली भोजपुरबाट आजै धनकुटा पुगेका थिए । ओलीमाथि थप्पड हानिएको भिडियो सामाजिक सञ्जालमार्फत सार्वजनिक भएको छ ।

उक्त भिडियोमा स्वागतका लागि हातमा माला बोकेर बसेका राईले ओलीमाथि हातपात गरेको देखिएको छ । धनकुटाका प्रमुख जिल्ला अधिकारी पुण्यविक्रम पौडेलले ओलीमाथि हातपात भएको पुष्टि गरे । उनका अनुसार राईले मादक पदार्थ सेवन गरेका थिए ।

कोशी प्रदेश प्रहरी प्रमुख डिआइजी राजेशनाथ बास्तोलाले राईको कुनै राजनीतिक दलसँग आवद्धता नरहेको पाइएको बताए । यसैबीच युवासंघ अध्यक्ष क्षितिज थेबेले भने ओलीमाथि आक्रमण नभएको दाबी गरे ।

मादक पदार्थ सेवन गरेर ओलीको स्वागतमा आएका राई माला लगाउने क्रममा अनियन्त्रित भएर आफैं लडेको उनले बताए ।

ओलीमाथि भएको आक्रमणको विषयमा प्रहरीले भने औपचारिक रूपमा कुनै जानकारी दिएको छैन ।

• #एमाले
• #केपी ओली
• #धनकुटा