तातोखबर, काठमाडौँ / ललितपुर मेयर्स कप राष्ट्रिय महिला टी-२० क्रिकेटमा साविक विजेता एपिएफ क्लबले सुखद शुरुवात गरेको छ।

आइतवार कीर्तिपुरस्थित त्रिवि क्रिकेट मैदानमा कोशी प्रदेशलाई २४ रनले पराजित गर्दै एपिएफले सुखद शुरुवात गरेको हो । यसअघि उद्घाटन खेलमा ललितपुर मेयर-११ ले बागमती प्रदेशलाई सहजै पराजित गरेको थियो।

Advertisement:

दोस्रो खेलमा वर्षाका कारण खेल ५ ओभरमा छोट्याइएको थियो। ५ ओभरमा एपिएफले दिएको ५७ रनको लक्ष्य पछ्याएको कोशीले ५ ओभर नै खेले पनि २ विकेटको क्षतिमा ३२ रन मात्र बनाउन सक्यो।

कोशीकी कप्तान अप्सरी बेगम २५ रनमा अविजित रहे पनि जित दिलाउन असफल भइन् । त्यसबाहेक अन्य ब्याटरले दोहोरो अंकमा रन जोड्न सकेनन्।

एपिएफकी कप्तान सीता रानामगरले १ विकेट लिइन्। त्यसअघि टस हारेर ब्याटिङको निम्तो पाएको एपिएफले ३ विकेट गुमाउँदै ५६ रनको चुनौतीपूर्ण योगफल बनायो।

इन्दु बर्माले १५ बलमा ३८ रनको योगदान गरिन्। उनको इनिङमा ५ चौका र २ छक्का रह्यो। खराब शुरुवात गरेको एपिएफका लागि इन्दुबाहेक अन्य ब्याटर चल्नै सकेनन्।

कोशीको बलिङमा एलिसा खडिया र हिरणमयी रोयले १/१ विकेट लिए। २ ओभर बलिङ गरेकी सबनम राई महँगो सावित भइन्।

• #एपिएफ क्लब
• #कोशी प्रदेश
• #क्रिकेट
• #त्रिवि क्रिकेट मैदान
• #बागमती प्रदेश
• #महिला टी-२० क्रिकेट
• #ललितपुर मेयर्स कप