दाङ, असार २० / लुम्बिनी प्रदेशमा नेकपा (एमाले)ले सरकारलाई दिएको समर्थन फिर्ता लिएको छ। नयाँ सत्ता समीकरण बने सँगै एमालेले लुम्बिनी प्रदेशमा सरकारलाई दिएको समर्थन फिर्ता लिएको हो।

एमाले लुम्बिनी प्रदेश संसदीय दलका नेता लीला गिरीले मुख्यमन्त्रीलाई पत्र लेख्दै समर्थन फिर्ता लिएको जानकारी गराएका थिए।

Advertisement:

सहमतिको सरकार गठन गरेर राजनीतिक स्थायित्व प्रदान गर्ने उद्देश्यले नयाँ सरकार गठनको पहल गरिएकाले आजकै मितिदेखि लागु हुने गरि समर्थन फिर्ता लिएको एमाले लुम्बिनी प्रदेश संसदीय दलका नेता लीला गिरीद्वारा हस्ताक्षर गरिएको पत्रमा उल्लेख गरिएको छ।

सरकारलाई दिएको समर्थन फिर्ता लिएसँगै एमालेबाट लुम्बिनी प्रदेशमा सहभागी मन्त्रीले राजीनामा दिने तयारी छ। मुख्यमन्त्री जोगबहादुर महराले बुधबार साँझ आयोजना गरेको रात्रीभोज कार्यक्रममा राजीनामा दिने तयारी रहेको श्रोतले जानकारी दिएको छ।

पार्टीले दिएको समर्थन फिर्ता लिएसँगै आज नै मुख्यमन्त्रीलाई राजीनामापत्र बुझाउने तयारी रहेको लुम्बिनी प्रदेश अर्थिक मामिला तथा योजना मन्त्री चेतनारायण आचार्यले जानकारी दिनुभएको छ।

• #नयाँ सत्ता समीकरण
• #नयाँ सत्तागठबन्धन
• #नेकपा एमाले
• #राजनीति
• #लुम्बिनी प्रदेश
• #समर्थन फिर्ता
• #सरकार गठन