काठमाडौँ / सहकारी संस्था बचत रकम दुरुपयोग संसदीय छानबिन विशेष समितिले पीडितहरूसँग छलफल गर्ने निर्णय भएको छ। मंगलवार सिंहदरबारमा बसेको समितिको बैठकले असार २६ गते बुधवार (भोलि) पीडितहरूसँग छलफल गर्ने निर्णय गरेको हो।

सहकारीका पीडितहरूसँग प्रतिनिधिमूलक ढंगले छलफल गर्ने निर्णय गरिएको विशेष समितिका सभापति सूर्यबहादुर थापा ‘क्षेत्री’ले जानकारी दिए। आजको बैठकमा सहकारी विभागका पदाधिकारीसँग छलफल गरिएको थियो। बुधवार पीडितहरूसँग छलफल गरी त्यहाँभित्रको समस्या समाधानका लागि थप तथ्यहरूको खोजी गर्ने काम हुने पनि विशेष समितिले जनाएको छ।

Advertisement:

सभापति थापाले भने, ‘भोलि हामीले पीडितका प्रतिनिधिहरूसँग प्रतिनिधिमूलक ढंगले छलफल गर्ने योजना बनाएका छौँ। २९ वटै सहकारी र अरू पनि सहकारीका प्रतिनिधिमूलक पीडितहरूलाई बोलाएका छौँ। सबै पीडितहरू बोलाएर छलफल गर्न सम्भव हुन्न। हामीले विभिन्न संघर्ष समितिका रूपमा, व्यक्तिगतरूपमा अनेक हिसाबले सहकारीबाट पीडित भएकाहरूका कुरा सुन्ने कार्यक्रम बनाएका छौँ।’

विशेष समितिले यसअघि सम्बन्धित निकाय र विज्ञहरूसँग छलफल गरेको थियो। अब पीडितहरूसँग पनि छलफल गरी सहकारी क्षेत्रमा देखिएका समस्या समाधानका उपायको खोजी गरिने पनि विशेष समितिका सभापति थापाले बताए।

• #छलफल
• #निर्णय
• #संसदीय छानबिन समिति
• #सहकारी