काठमाडौँ /  कागजात प्रमाणीकरणसम्बन्धी सेवाका लागि फ्रान्सस्थित नेपाली दूतावासको टोली पोर्चुगल जाने भएको छ।

कागजात प्रमाणीकरणलगायतका कन्सुलर सेवा दिन दूतावासको टोली यही अगष्ट २९ मा पोर्चुगल तर्फ जाने दूतावासले जनाएको छ। प्रहरी चारित्रिक प्रमाणपत्र (प्रहरी रिपोर्ट) लगायत कागजात प्रमाणीकरणसम्बन्धी समस्यामा परेका नेपालीलाई लिस्बनबाटै कन्सुलर सेवा दिने गरी टोली पठाउन लागिएको पोर्चुगलका लागि गैरआवासीय नेपाली राजदूत तथा फ्रान्सका लागि नेपाली राजदूत सुधीर भट्टराईले बताए।

Advertisement:

पोर्चुगलमा कागजात प्रमाणीकरणसम्बन्धी हाल देखा परेको समस्या मध्यनजर गरी परराष्ट्र मन्त्रालयसँगको समन्वयमा टोली पठाउने तयारी गरिएको राजदूत भट्टराईले बताए। टोलीले कन्सुलर विभाग काठमाडौंले प्रमाणीकरण गरेको प्रहरी चारित्रिक प्रमाणपत्र, जन्मदर्ता, नाता प्रमाणित, विवाह दर्तालगायतका  कागजात प्रमाणीकरणका साथै अन्य कन्सुलर सेवा प्रदान गर्ने उनले बताए।

राजदूत भट्टराईका अनुसार घुम्ती सेवाका लागि दूतावासका दुई जना कर्मचारी पोर्चुगल आउने तय भएको छ भने टोलीले करिब एक सातासम्म राजधानी लिस्बनमा रहेर कन्सुलर सेवा प्रदान गर्ने बताइएको छ। ​गैरआवासीय नेपाली संघ पोर्चुगलको कार्यालयबाट प्रवाह हुने घुम्ती सेवा सेप्टेम्बर ३ तारिखसम्मचल्ने दूतावासले जनाएको छ ।

• #कन्सुलर सेवा
• #दूतावास
• #नेपाली दूतावास
• #परराष्ट्र मन्त्रालय
• #पोर्चुगल
• #प्रहरी चारित्रिक प्रमाणपत्र
• #प्रहरी रिपोर्ट
• #राजदूत
• #लिस्बन