काठमाडौं / एभरेस्ट महिला भलिबल लिगमा ललितपुर क्विन्सले लगातार दोस्रो खेलमा पनि जित निकालेको छ।

त्रिपुरेश्वरस्थित राष्ट्रिय खेलकुद परिषद् (राखेप) कभर्डहलमा भएको खेलमा ललितपुरले मधेश युनाइटेडलाई ३–१ सेटमा पराजित गर्‍यो।

Advertisement:

पहिलो सेट २५–१५ को सहज जित निकालेको ललितपुरले दोस्रो सेटमा भने केही संघर्ष गर्नु पर्यो। निकै प्रतिस्पर्धात्मक बनेको सेटमा ललितपुर २६–२४ ले विजयी भयो। रोमाञ्चक तेस्रो सेट भने ललितपुरले २४–२६ ले गुमाउन पुग्यो।

चौथो सेट २५–२२ ले नतिजा आफ्नो पक्षमा पार्दै ललितपुरले विजयी यात्रालाई कायम राख्यो।

लगातार दोस्रो जितसँगै दुई खेलमा ६ अंक जोडेको ललितपुर शीर्षस्थानमा उक्लिएको छ।  दुवै खेलमा पराजित मधेश अंकविहीन छ।

पहिलो खेलमा ललितपुरले काठमाडौं स्पाइकर्सलाई ३–१ को सेटमा हराउँदा मधेश कर्णाली यश्विजसँग ३–१ कै सेटमा पराजित भएको थियो।

आज ललितपुरले कर्णाली र मधेशले चितवन शक्तिको सामना गर्नेछन्।

मंगलबारै सम्पन्न खेलमा कर्णालीले गण्डकी थन्डर्सलाई ३–२ तथा काठमाडौंले चितवनलाई ३–१ सेटमा पराजित गरे।

• #एभरेस्ट महिला भलिबल लिग
• #भलिबल
• #मधेश युनाइटेड
• #महिला भलिबल
• #राखेप
• #राष्ट्रिय खेलकुद परिषद्
• #ललितपुर क्विन्स