ताताेखबर, काठमाडौँ / काठमाडौँ महानगरपालिकाले  ‘आरबी कम्प्लेक्स’ र ‘पिपुल्स प्लाजा’लाई ३५ दिनभित्र कर बुझाउनका लागि पत्राचार गरेको छ ।

लामो समयदेखि बहाल कर तिर्न आलटाल गरेकाले काठमाडौँ महानगरले पत्र लेखेको हो । आरबी कम्प्लेक्सले अहिलेसम्मकै बहाल र सम्पत्ति कर नतिरेको महानगरले जनाएकाे छ  । ‘पिपुल्स प्लाजा’ले विगत तीन वर्षदेखि बहाल र सम्पत्ति कर नतिरेको कामपाको राजस्व विभागले जानकारी दिएकाे छ ।

Advertisement:

कामपा राजस्व विभागका प्रमुख ध्रुव काफ्लेका अनुसार लामो समयसम्म कर नतिरेकाले कामपाले ३५ दिनभित्र सबै बक्यौता रकम चुक्ता गर्न पत्राचार गरेको हो ।

यो विषयमा कामपाले केही दिनअघि स्थलगत अनुगमन गरी विवरण मागेको थियो। यसपछि टोलीले कम्प्लेक्स सञ्चालकलाई सात दिनभित्र विवरण पेश गर्न र ३५ दिनभित्र वडा कार्यालयमा गएर बक्यौता तिर्न पत्राचार गरिएको प्रमुख काफ्लेले जानकारी दिए ।

लामो समयसम्म बक्यौता रकम तिर्न आलटाल गरेपछि कामपाले पछिल्लो समय रकम चुक्ता गर्न निर्देशन दिएको हाे ।

घर बहालमा आर्जन हुने आयको १० प्रतिशत बहाल कर स्थानीय सरकारलाई बुझाउनुपर्ने कानुनी व्यवस्था छ। आरबी कम्प्लेक्समा ३१५ व्यवसायी र पिपुल्स प्लाजामा १६० व्यवसायी छन्।

‘यी व्यवसायीले व्यवसाय कर तिर्नुपर्छ। बहाल अंकमा लाग्ने बहाल कर स्थानीय सरकारलाई तिर्ने हो, बहाल आयमा लाग्ने कर संघीय सरकारलाई तिर्ने हो’, काफ्लेले प्रष्ट पारे।

• #आरबी कम्प्लेक्स
• #कर
• #काठमाडौं महानगरपालिका
• #पत्राचार
• #पिपुल्स प्लाजा
• #बहाल कर