सहकारी ठगीविरुद्ध काठमाडौंमा आज कांग्रेसले प्रदर्शन गर्दै
![](https://www.tatokhabar.com/wp-content/uploads/2023/11/nepali-congress.png)
काठमाडौं / प्रतिपक्षी नेपाली कांग्रेसले सहकारीको बसचत हिनामिना तथा ठगीविरुद्ध आइतबार प्रदर्शन गर्दैछ।
बुधबार बसेको केन्द्रीय कार्यसमितिको बैठकले काठमाडौं उपत्यकाका तीन जिल्लाका १५ निर्वाचन क्षेत्रबाट प्रदर्शन गर्ने निर्णय गरेको थियो।
विरोध प्रदर्शनका लागि पार्टीले उपत्यकाका १५ क्षेत्रमा १५ नेतालाई प्रतिनिधि खटाएको छ। प्रदर्शनपछि दिउँसो १ बजे प्रदर्शनी मार्गमा आमसभा गर्ने कांग्रेसले जनाएको छ।
सहकारी बचतकर्ताको रकम फिर्ता गर्नुपर्ने, गृहमन्त्री रवि लामिछानेमाथि संसदीय छानबिन हुनुपर्नेसहितका माग राखेर कांग्रेसले उपत्यकाकेन्द्रित सडक आन्दोलन गर्न लागेको हो। उपत्यकापछि क्रमशः प्रदेश र जिल्ला तहमा पनि आन्दोलन गर्ने कांग्रेसको तयारी छ।
विभिन्न सहकारीबाट करिब पाँच खर्ब रुपैयाँ हिनामिना भएको निष्कर्ष कांग्रेसले निकालेको छ। यही विषयमा संसदमा अवरोध गर्दै आएको कांग्रेसले सरकार गम्भीर नबनेपछि आन्दोलन गर्नुपरेको बताएको छ।