काठमाडौं / काठमाडौं, ललितपुर र कैलालीमा गरी हैजा संक्रमितको संख्या २५ जना पुगेको छ। अगस्ट २ सम्मको साउनको इपिडिमियोलोजी तथा रोग नियन्त्रण महाशाखा (इडिसिडी)को रिपोर्टअनुसार तीन जिल्लाका २५ जनामा हैजाको संक्रमण देखिएको छ।

पछिल्लो समय काठमाडौंको टोखा नगरपालिकामा एकजना र ललितपुरको ग्वार्को क्षेत्रमा २ जना संक्रमित थपिएका छन्। यसअघि नै ललितपुर, कालिमाटी र कैलालीमा गरी २२ जना संक्रमित रहेका थिए। योसँगै ललितपुर काठमाडौं र कैलाली गरी यो वर्ष २५ जना हैजाका संक्रमित थपिएका छन्।

Advertisement:

अंग्रेजीमा कोलेरा भनिने हैजा संक्रामक रोग हो। ‘भिब्रियो कोलेरा’ नामको ब्याक्टेरियाको संक्रमणबाट मानिसलाई हैजा हुने गर्दछ । हैजा कडाखालको झाडापखला हो यदि समयमै उपचार गरिएन भने हैजा संक्रमणले जटिल प्रकारको स्वास्थ्य समस्या निम्त्याउने गर्छ।

हैजा प्रायः वर्षाको समय र गर्मीयाममा बढी फैलिने गरेको छ। सरसफाइ र दूषित पानीको अभावले यसको जोखिमलाई बढाउने गर्दछन्। दिसाको परीक्षण गरेर हैजाको पहिचान गर्न सकिन्छ। १५ साउनमा स्वास्थ्य तथा जनसंख्या मन्त्रालयले हैजाको संक्रमण देखिएको भन्दै यसबाट सजग र सचेत रहन आग्रह गरेको थियो।

हैजा लागेमा पातलो चौलानी पानीजस्तो दिसा हुने, वाकवाकी लाग्ने, पिसाबको रंग पहेँलो हुने, चिडचिडापन हुने, रक्तचाप कम हुने, मुटुको धड्कन अनियन्त्रित हुने र बेहोस हुनेजस्ता लक्षणहरु देखिन्छन्। मन्त्रालयले गर्मी तथा वर्षायाममा झाडापखाला, हैजा तथा पानीजन्य रोगहरू फैलने हुँदा सजग र सतर्क रहन आग्रह गरेको छ। उसले झिँगा लागेका, बासी, सडेगलेका, नपाकेका, चिसिएको खुलास्थानका खाद्य पदार्थ नखान र पानीलाई उमालेर वा क्लोरिन प्रयोग गरेर मात्र पिउनसमेत भनेको छ।

साथै, दिसा पिसाब गरिसकेपछि साबुन पानीले मिचिमिची हात सफा गर्न, व्यक्तिगत तथा खानेकुराको सरसफाइमा विशेष ध्यान दिन र चर्पीको प्रयोग गर्नसमेत आग्रह गरेको छ।

• #इडिसिडी
• #भिब्रियो कोलेरा
• #मन्त्रालय
• #संक्रमित
• #हैजा