नैतीकताको हिसावले अर्थमन्त्रीले राजीनामा दिनुपर्ने ः एमाले सांसद
![](https://www.tatokhabar.com/wp-content/uploads/2022/06/Sansad-Bhawan-scaled.jpg)
काठमाडौं, ३१ जेठ । नेकपा (एमाले)का सांसदहरुले अर्थमन्त्री जनार्दन शर्माको राजीनामा माग गरेका छन् । अर्थमन्त्री शर्मामाथि गम्भीर प्रश्न उठेको भए पनि उनले त्यसबारे संसदलाई जानकारी नदिएको एमाले सांसदहरुको आरोप छ ।
एमाले सांसद सुरेन्द्र पाण्डेले अर्थमन्त्री शर्मा प्रति आक्रोश व्यक्त गर्दै भने, ‘यति गम्भीरताका साथ प्रश्न खडा भइसकेपछि अर्थमन्त्रीले संसदमा प्रष्ट पार्नु भएन । करका दरहरु तलमाथि भए भनेर म लगायत माननीयले कुरा राखेका थियौँ ।’
करका दरहरुबारे छलफल हुँदा अर्थमन्त्रालयका कर्मचारी बाहेकलाई प्रवेश नदिइने प्रचलन रहेको पाण्डेको भनाइ छ । उनले करको दरबारे छलफल भइरहेका बेला मन्त्री बाहेकलाई फोन समेत लिन नपाउने प्रचलन रहेको भए शर्माले भने बाह्य व्यक्ति बोलाएर करका दर परिवर्तन गराएको पाण्डेको आरोप छ । पाण्डे पूर्व अर्थमन्त्री समेत हुन् ।
‘अर्थमन्त्रालयका कर्मचारी बाहेक अरुलाई प्रवेश दिइदैन करका दरहरु निर्धारण गर्दा । यो कस्तो खालको साटगाँठमा भएको हो? जानकारी चाहियो,’ उनले भने ।
उनले अर्थमन्त्री शर्मा अब पदमा बस्न नमिल्ने बताएका छन् । प्रधानमन्त्री शेरबहादुर देउवाले समेत उक्त विषयमा जवाफ दिनुपर्ने पाण्डेको भनाइ छ । ‘यति गम्भीर प्रश्न उठेपछि उहाँ त्यो पदमा बसिरहन मिल्छ ?
नैतिक हिसाबले मन्त्री त्यो पदमा बस्न मिल्दैन,’ पाण्डले भने ।