करिब २३ लाख कोभिडविरुद्धको पेडियाट्रिक खोप काठमाडौंमा
![](https://www.tatokhabar.com/wp-content/uploads/2022/07/COVS.jpg)
काठमाडौं, असार १९ गते । ५ देखि ११ वर्षसम्मका बालबालिका लागि दिइने फाइजर बायोन्टेकको करिब २३ लाख कोभिडविरुद्धको पेडियाट्रिक खोप काठमाडौं आइपुगेको छ । कोभ्याक्स सुविधामार्फत फाइजर बायोन्टेकको २२ लाख ९९ हजार २०० मात्रा पेडियाट्रिक डोज खोप काठमाडौं आइपुगेको स्वास्थ्य सेवा विभाग जनाएको छ ।
सरकारले २७ जिल्लामा असार ९ देखि १५ गतेसम्म पहिलो चरणको खोप अभियान सञ्चालन गरेको थियो । ५ देखि ११ वर्ष उमेर समुहका ३९ लाख बालबालिकालाई खोप लगाउने सरकारको लक्ष्य छ । त्यसको लागि कोभ्याक्सले ८४ लाख डोज खोप अनुदानमा उपलव्ध गराउने भएको छ ।
यसअघि कोभ्याक्स मार्फत गत ६ असारमा पनि २२ लाख डोज खोप प्राप्त गरेको थियो । खोप माइनस ७० डिग्री सम्मको तापक्रममा भण्डारण गर्नुपर्ने भएकाले नेपालले कोल्ड चेनको क्षमता अनुसार खोप चरणवद्ध रुपमा ल्याएको विभागले जनाएको छ । आज प्राप्त खोप अभियान सञ्चालन गरिएका २७ जिल्लामा पहिलो मात्रा लगाउन छुटेका बालबालिका र दोस्रो डोजको लागि प्रयोग गरिने विभागले जानकारी दिएको छ ।
पहिलो मात्रा खोप लगाएका बालबालिकालाई आगामी साउन २ देखि ८ गतेसम्म दोस्रो मात्रा खोप दिइने मन्त्रालयले जनाएको छ । सरकारले विद्यालयमै खोप केन्द्र तोकेको छ । देशका बाँकी ५० वटा जिल्लामा भदौ ५ देखि ११ गतेसम्म पहिलो मात्रा र भदौ २७ देखि असोज १ गतेसम्म दोस्रो मात्राको खोप दिने तयारी छ ।