गौतम बुद्ध अन्तर्राष्ट्रिय क्रिकेट रंगशाला निर्माणको बाटो खुल्यो
तातो खबर
तातोखबर, काठमाडौँ / आर्थिक अभावका कारण अलपत्र अवस्थामा रहेको चितवनस्थित गौतम बुद्ध अन्तर्राष्ट्रिय क्रिकेट रंगशाला निर्माणका लागि बाटो खुलेको छ।
भरतपुर उपमहानगरपालिकाको कार्यालयका अनुसार गत मंगलवार बसेको मन्त्रिपरिषद् बैठकले रंगशालालाई बागमती प्रदेश सरकारसँगको साझेदारीमा बनाउन चितवनको भरतपुर महानगरपालिकालाई सहमति दिएको हो।
भरतपुर महानगरपालिकालाई रंगशाला निर्माण, सञ्चालन र व्यवस्थापन प्रयोजनका लागि सहमति प्रदान गरेको नेपाल सरकारका सञ्चार तथा सूचना प्रविधिमन्त्री रेखा शर्मालाई उद्धृत गर्दै महानगरपालिकाले जनाएको छ।
महानगरपालिकासँग प्रदेश सरकारले पहिलो चरणमा ७५ करोड रुपैयाँको काम गर्ने गरी सहमति भइसकेको थियो । तर भरतपुर महानगरपालिकाले तयार गरेको लागत इस्टिमेट अनुसार राष्ट्रिय स्तरका खेल खेल्न मिल्ने बनाउन एक अर्ब लाग्ने देखिएको छ ।
भरतपुर महानगरपालिका प्रमुख रेनु दाहालले लागत अनुमान बनाउँदा एक अर्ब रुपैयाँ लाग्ने देखिएकोले यसअघिको सहमतिअनुसार बजेट सुनिश्चित गर्न प्रदेश सरकारलाई प्रस्ताव पठाइसकेको बताएकी छिन् ।
पहिलो चरणमा खेल मैदान र पारपिट लगायतका काम सकेर खेल खेल्न मिल्ने बनाइने उनको भनाइ छ । लागत तयार गर्दा पहिलो चरणमा एक अर्बको काम गर्नै पर्ने देखिएकाले ७० करोड रुपैयाँ प्रदेश सरकारलाई व्यवस्था गर्न भनिएको र ३० करोड रुपैयाँ महानगरपालिकाको कार्यालयले बेहोर्ने पनि दाहालले बताएकी छिन् ।
चन्दा उठाएर रंगशाला निर्माण शुरु गरेको धुर्मुस सुन्तली फाउण्डेसनले १९ करोड ऋण लागेको भन्दै दुई वर्षअघि निर्माणको काम छाडेको थियो । त्यसयता रङ्गशाला अलपत्र अवस्थामा छ । अब ठेक्का आह्वान गरेर निर्माणको काम अघि बढाउन बाटो खुलेको छ। नेपाल सरकारले गौतम बुद्ध क्रिकेट रंगशालासहित तीन वटा क्रिकेट रंगशालालाई राष्ट्रिय गौरवको आयोजनाका रूपमा समावेश गरेको छ।
प्रतिक्रिया दिनुहोस् :
तातोखबर
धेरै हेरिएको
-
आत्महत्या गरेका देवकोटालाई नेपाल इन्भेष्टमेन्ट मेगा बैंकमा उपस्थित हुन ३५ दिने सुचना
-
बैंकका अपरेशन इन्चार्जमाथि प्रभु बैंक गण्डकी प्रदेश अधिकृतको हातपात
-
कृषि बीमाको सरकारी अनुदान ठग्ने शिखर इन्स्योरेन्सलाई किन भएन कारबाही? के गर्दै छ प्राधिकरण
-
चन्द्रागिरि हिल्स : धर्मको नाममा लुट्ने मेसो, भालेश्वर मन्दिर दर्शन गर्न कम्तिमा १०० तिर्नुपर्ने
