तातोखबर, काठमाडौँ / प्रधानमन्त्री कप एकदिवसीय क्रिकेटमा मधेश प्रदेश तेस्रोपटक विजयी भएको छ। आज भएको खेलमा कर्णाली प्रदेशलाई ६१ रनले हराउँदै मधेश तेस्रोपटक विजयी भएको छ।

जितका लागि २३२ रनको लक्ष्य पछ्याएको कर्णालीले ४१.१ ओभरमा अलआउट हुँदै १७० रन मात्रै जोड्न सक्यो। उसका लागि अर्जुन घर्तीले सर्वाधिक ५८ रन बनाए पनि जित दिलाउन सकेनन्। दिनेश अधिकारीले ३३, विपीन शाहीले ३१ तथा प्रकाश जैशीले १४ रन बनाए पनि अन्य खेलाडीले दोहोरो अंकको रन बनाउन सकेनन्।

Advertisement:

त्यसअघि त्रिवि क्रिकेट मैदान कीर्तिपुरमा टस जितेर पहिले ब्याटिङ थालेको मधेशले निर्धारित ओभरमा ९ विकेट गुमाउँदै २३१ रन बनाएको थियो। मधेशका लागि कप्तान हरिशंकर शाह र मयन यादवले अर्धशतक प्रहार गर्दै समान ५०-५० रनको योगदान गरे। अनिल शाहले ४४ तथा अभिषेक तिवारीले ३४ रन जोडे। हरिशंकर शाह खेलको प्लेयर अफ दि म्याच घोषित भए।

तेस्रो जितसँगै मधेश ६ अंकसहित अंक तालिकाको तेस्रो स्थानमा उक्लिएको छ। प्रतियोगिता अन्तर्गत आइतबार भोलि दुई खेल हुनेछन्। भैरहवामा विभागीय टोली आर्मी र पुलिस भिड्दा मूलपानीमा गण्डकीले कोशीको सामना गर्नेछ।

• #कर्णाली प्रदेश
• #क्रिकेट
• #प्रधानमन्त्री कप
• #मधेश प्रदेश